Трамп прыняў Нобелеўскую прэмію міру ад Мачада

• 16.01.2026, 9:27

Прэзідэнт ЗША назваў учынак «выдатным жэстам узаемнай павагі».

Прэзідэнт ЗША Дональд Трамп прыняў Нобелеўскую прэмію, якую яму перадала лідар апазіцыі Венесуэлы Марыя Карына Мачада. Пра гэта піша Reuters са спасылкай на чыноўніка Белага дома.

Белы дом у сетцы X апублікаваў фота Трампа і Мачада, на якім прэзідэнт ЗША трымае вялікую рамку з выявай медаля.

«Прэзідэнту Дональду Дж. Трампу з удзячнасцю за Ваша выключнае лідэрства ў садзейнічанні міру праз сілу», — гаворыцца ў суправаджальным тэксце.

Як адзначыў Reuters, спроба Мачада паўплываць на Трампа адбылася пасля таго, як ён адмовіўся прызначыць яе лідаркай Венесуэлы пасля звяржэння дыктатара Нікаласа Мадуры.

Таксама выданне нагадала, што да сустрэчы з Мачада журналісты пыталіся ў Трампа, ці хоча ён, каб лідарка Венесуэлы аддала яму Нобелеўскую прэмію.

«Не, я гэтага не казаў. Яна атрымала Нобелеўскую прэмію міру», — цытуе агенцтва адказ кіраўніка Белага дома.

Трамп назваў учынак Мачада «цудоўным жэстам узаемнай павагі».

«Марыя ўручыла мне сваю Нобелеўскую прэмію міру за праведзеную працу. Такі цудоўны жэст узаемнай павагі. Дзякуй, Марыя!» — напісаў ён у сацсетцы.

Тым часам, нагадала выданне, у Нобелеўскім камітэце падкрэслілі, што прэмія не можа быць перададзеная, падзеленая або ануляваная.