Частка Жодзіна ў мароз засталася без ацяплення і гарачай вады

• 16.01.2026, 1:00

На цеплатрасе адбылася аварыя.

У Жодзіне частка жылых дамоў і дзіцячы сад вечарам 15 студзеня засталіся без ацяплення і гарачай вады з-за аварыі на цеплатрасе, паведамілі ў «Мінскэнерга».

«Сёння вечарам у Жодзіне ў раёне вул. Цімірязева, 9 на ўчастку цеплавой магістралі дыяметрам 259 мм адбыўся прарыў цеплатрасы з выкідам вады. Аварыйная сітуацыя аператыўна лакалізавана, у цяперашні час спецыялісты РУП «Мінскэнерга» праводзяць тэрміновыя рамонтна-аднаўленчыя працы. У выніку аварыі часова адключаныя ад ацяплення і гарачага водазабеспячэння частка жылых дамоў па вуліцах Цімірязева, Веніс’е, Навуковая, а таксама дзіцячы сад № 8, размешчаны па адрасе вуліца Цімірязева, 1», — гаворыцца ў паведамленні.

Прычыны пашкоджання трубаправода высвятляюцца.

З мэтай аператыўнага аднаўлення цеплазабеспячэння спажыўцоў прыцягнутыя дзве брыгады і тры адзінкі спецтэхнікі.