Вялікабрытанія выводзіць вайскоўцаў з авіябазы ў Катары разам з ЗША

• 14.01.2026, 22:27

Ці рыхтуе Вашынгтон удар па Ірану?

З авіябазы Аль-Удэйд у Катары пакідаюць не толькі амерыканскія, але і брытанскія вайскоўцы.

Пра гэта паведамляе The i Paper.

Выданне адзначае, што вайскоўцы Каралеўскіх ВПС Вялікабрытаніі (RAF) былі размешчаныя на базе Аль-Удэйд разам з амерыканскімі сіламі.

Журналісты ўдакладняюць, што самалёт-запраўшчык RAF вылецеў з авіябазы Акротыры на Кіпры ў напрамку базы Аль-Удэйд, аднак даныя палёту паказвалі, што затым ён разгарнуўся назад у бок Еўропы.

Аль-Удэйд — найбуйнейшая база ЗША ў рэгіёне, на якой размешчаныя каля 10 000 амерыканскіх вайскоўцаў. У чэрвені 2025 года яна падверглася ўдару іранскіх ракет пасля амерыканскага ўдару па іранскіх ядзерных аб’ектах.

У мінулым годзе частка персаналу і членаў іх сем’яў была выведзена з амерыканскіх баз на Блізкім Усходзе за тыдзень да таго, як ЗША нанеслі авіяўдары па Ірану.