У частцы гарадоў Украіны могуць адмяніць камэнданцкую гадзіну

• 14.01.2026, 21:41

Зяленскі запісаў відэазварот.

У некаторых гарадах і абшчынах могуць адмяніць камэнданцкую гадзіну пасля ўвядзення надзвычайнай сітуацыі ў энергетыцы Украіны, якая ўзнікла з-за расійскіх атак і пахаладання. Пра гэта паведаміў прэзідэнт Украіны Уладзімір Зяленскі у вячэрнім звароце.

«Я даручыў перагледзець правілы для камэнданцкай гадзіны: на час надзвычайнай сітуацыі можам прыбраць камэнданцкую гадзіну для часткі гарадоў і абшчын. Там, дзе сітуацыя з бяспекай гэта дазваляе, безумоўна», — заявіў кіраўнік дзяржавы.

Паводле слоў Зяленскага, адпаведныя прапановы павінны прадставіць члены Кабінета Міністраў.

Скасаванне камэнданцкай гадзіны патрэбнае, каб «у любы час людзі маглі атрымаць усю неабходную падтрымку», і каб бізнес мог «больш рацыянальна» планаваць сваю працу.