Кароль Навроцкі — беларусам: Польшча вас ніколі не пакіне
- 14.01.2026, 15:26
Прэзідэнт Польшчы салідарны з беларускім народам.
Прэзідэнт Польшчы Кароль Навроцкі сустрэўся з прадстаўнікамі беларускай дыяспары, былымі палітвязнямі, апазіцыйнымі палітыкамі і журналістамі. На традыцыйнай сустрэчы, якая адбылася 13 студзеня ў прэзідэнцкім палацы ў Бельведэры, Кароль Навроцкі гаварыў пра супольную гісторыю беларусаў і палякаў, паведамляе карэспандэнт сайта Charter97.org:
— Разам са свабодным беларускім народам мы стваралі Рэч Паспалітую, разам былі адказныя за Другую Рэч Паспалітую (міжваенную Польшчу — Заўв. Charter97.org), разам змагаліся ў паўстаннях, а іх сімвалам для нас, палякаў, а таксама беларусаў, з'яўляецца Канстанцін Каліноўскі. Мы разам змагаліся з савецкай арміяй у 1939 годзе, а генерал Булак-Балаховіч застаецца часткай гісторыі польскага і беларускага народа.
Кароль Навроцкі звярнуўся да беларусаў, якія працягваюць барацьбу з рэжымам Лукашэнкі:
— Як прэзідэнт Польшчы я хачу падзякаваць усім свабодным беларусам, якія знаходзяцца на цяжкім шляху, што патрабуе ад вас самаахвярнасці, для некаторых — знаходжання ў турмах рэжыму Лукашэнкі. Але вы на сваім доўгім шляху да незалежнасці і суверэнітэту, і на гэтым шляху Польшча вас ніколі не пакіне.
Кіраўнік польскай дзяржавы таксама ўзгадаў палітвязня Анджэя Пачобута, якога ў лістападзе 2025 года завочна ўзнагародзіў найвышэйшай дзяржаўнай узнагародай Польшчы — ордэнам Белага Арла.
«Няхай гэта стане сімвалам таго, што вольная, незалежная і суверэнная Польшча і яе прэзідэнт ніколі не забудуць палякаў, якія знаходзяцца ў зняволенні ў беларускіх турмах», — заявіў Навроцкі.
Экс-кандыдат у прэзідэнты Святлана Ціханоўская, якая брала ўдзел у сустрэчы, падзякавала і ў адказ заявіла, што «беларусы ніколі не былі чужымі палякам, так жа як і Польшча заўсёды была побач з беларусамі».
На сустрэчу з прэзідэнтам Польшчы былі запрошаныя былыя палітвязні — Вікторыя Кульша, Паліна Шарэнда-Панасюк, Максім Знак, Марына Золатава, Наталля Малец, Ірына Слаўнікава, Ксенія Луцкіна, Алег Рубец, Андрэй Селянінаў, Уладзімір Гарох, галоўная рэдактарка сайта Charter97.org Наталля Радзіна, лідар грамадзянскай кампаніі «Еўрапейская Беларусь» Андрэй Саннікаў, каардынатар «Еўрапейскай Беларусі» Дзмітрый Бандарэнка, былы кандыдат у прэзідэнты, паэт Уладзімір Някляеў, ксёндз Вячаслаў Борок, трохразовая прызёрка Алімпійскіх гульняў, чэмпіёнка свету і Еўропы па плаванні Аляксандра Герасіменя, дырэктар тэлеканала «Белсат» Аліна Коўшык, журналісты Агнешка Рамашэўска, Аляксей Дзікавіцкі, Вітаўт Сіўчык, Сяргей Пелеса, Зміцер Лукашук, Дзяніс Дудзінскі, вядомы актор Алег Гарбуз, кіраўніца Вольнага хору Галіна Казіміроўская, гурт Naviband, Святлана Ціханоўская, прадстаўнікі яе офіса і іншыя.