Сіноптыкі спрагназавалі, як доўга пратрымаюцца маразы да -30°С у Беларусі

• 14.01.2026, 9:46

Краіна апынулася ва ўладзе «здаровеннага антыцыклона».

Сіноптыкі пралічылі, колькі яшчэ пратрымаюцца ў Беларусі дваццаціградусныя маразы, што прыйшлі на змену снежнаму цыклону Уллі, а таксама далі прагноз, ці паўторацца багатыя снегапады, якія засыпалі краіну на мінулым тыдні, піша «Телеграф».

Як патлумачылі аўтары Telegram-канала @nadvorie, на гэтым тыдні Беларусь апынулася ва ўладзе «здаровеннага антыцыклона», які і прынёс нам з Сібіры рэзкае пахаладанне. Паводле разлікаў спецыялістаў, на яго перыферыі краіна будзе заставацца прынамсі да 25 студзеня, то бок яшчэ паўтары тыдні.

«Захаваецца марознае надвор'е, у некаторыя ночы тэмпература будзе апускацца да -20..-25°С», — папярэдзілі аўтары канала.

У Белгідрамеце іх тэмпературны прагноз пацвердзілі. Пры гэтым, згодна з аператыўнымі данымі, у некаторых рэгіёнах у бліжэйшыя дні будзе яшчэ марозней, а дзе-нідзе пры праясненнях тэрмометры могуць паказаць і трыццаціградусныя значэнні.

Так, у ноч з 15 студзеня на 16 студзеня жыхарам Віцебскай і Магілёўскай абласцей дзяржаўныя сіноптыкі паабяцалі маразы да -25..-29°С, на Міншчыне і Гомельшчыне ў гэтую ноч чакаецца да -25..-28°С, з прычыны чаго ў рэгіёнах абвясцілі жоўты ўзровень небяспекі.

А вось што да ападкаў, то іх спецыялісты ў бліжэйшыя тыдні ў вялікай колькасці ў Беларусі не абяцаюць. Як патлумачылі аўтары Telegram-канала пра надвор'е «Метеовайб», з-за росту атмасфернага ціску да канца тыдня верагоднасць ападкаў знізіцца да нуля. Паводле ансамблевага прагнозу еўрапейскай мадэлі ECMWF, на наступным тыдні колькасць ападкаў у Беларусі будзе ніжэй за кліматычную норму.

Дарэчы, камунальнікі папярэдзілі беларусаў пра новую небяспеку, якая можа падпільноўваць іх пасля багатых снегападаў. Патэнцыйна небяспечныя зоны супрацоўнікі ЖКГ будуць пазначаць і агароджваць, але і ад саміх людзей запатрабавалі «асабістай пільнасці».