У Літве затрымалі шэсць чалавек, звязаных з кантрабандай цыгарэт з Беларусі з дапамогай метэаразондаў

• 14.01.2026, 8:46

Служба аховы дзяржаўнай мяжы паведаміла падрабязнасці.

У Літве затрымалі групу з шасці чалавек, якая перапраўляла ў краіну з Беларусі з дапамогай метэаразондаў беларускія цыгарэты. Пра гэта паведамляе Служба аховы дзяржаўнай мяжы Літвы.

У групу ўваходзілі шэсць чалавек. Узрост падазраваных — ад 25 да 46 гадоў, гэта жыхары горада Вільнюса, а таксама Віленскага і Шальчынінкайскага раёнаў. Падчас вобшукаў па месцах жыхарства і ў аўтамабілях падазраваных было выяўлена і канфіскавана 7,5 тысячы пачак цыгарэт беларускай вытворчасці, наяўныя грошы, SIM-карты літоўскіх і беларускіх аператараў мабільнай сувязі, мабільныя тэлефоны. Пасля агляду былі таксама канфіскаваныя два транспартныя сродкі.

Усе затрыманыя змешчаны ў ізалятар часовага ўтрымання. У бліжэйшы час будзе вырашана пытанне аб прымяненні да іх мер стрымання.

«Сёлета ўсяго было перахоплена сем паветраных шароў, з дапамогай якіх з Беларусі спрабавалі перапраўляць нелегальныя тытунёвыя вырабы. На склады памежнікаў паступілі 24 тысячы пачак цыгарэт, якія, меркавана, былі дастаўлены ў Літву па паветры», — дадалі ў Службе аховы дзяржаўнай мяжы.