Абвінавачанне запатрабавала смяротнага пакарання для экс-прэзідэнта Паўднёвай Карэі

• 14.01.2026, 5:59

Юна Сок Ёля ахарактарызавалі як кіраўніка мяцяжу, які спрабаваў утрымаць уладу.

Пракуратура Паўднёвай Карэі запатрабавала смяротнае пакаранне для экс-прэзідэнта Юна Сок Ёля, які праходзіць абвінавачаным па справе аб увядзенні ваеннага становішча ў 2024 годзе. Пра гэта паведаміла агенцтва Yonhap.

Каманда спецпракурораў вылучыла патрабаванне пра смяротнае пакаранне падчас заключнага пасяджэння па справе Юна Сок Ёля ў судзе Сеула. Абвінавачанне ахарактарызавала экс-кіраўніка дзяржавы як кіраўніка мяцяжу, які імкнуўся ўтрымаць уладу, захапіўшы кантроль над судовай і заканадаўчай галінамі ўлады.

Чакаецца, што суд вынесе прысуд на пачатку лютага.

Былому прэзідэнту прад'яўлена абвінавачанне ў змове з экс-кіраўніком Мінабароны Паўднёвай Карэі і іншымі асобамі з мэтай арганізацыі мяцяжу дзеля падрыву Канстытуцыі.

Сярод абвінавачанняў таксама мабілізацыя войскаў і паліцыі для блакавання комплексу Нацыянальнага сходу, арышт і затрыманне шэрагу палітыкаў, уключаючы спікера парламента. Паводле версіі абвінавачання, такім чынам Юн Сок Ёль спрабаваў перашкодзіць дэпутатам прагаласаваць за адмену яго ўказу аб увядзенні ваеннага становішча.

Позна ўвечары 3 снежня 2024 года Юн Сок Ёль выступіў з відэазваротам да нацыі і заявіў, што абвяшчае «надзвычайнае ваеннае становішча для абароны Рэспублікі Карэя ад пагрозы паўночнакарэйскіх камуністычных сіл». Праз 150 хвілін пасля яго заявы парламент прагаласаваў за тое, каб патрабаваць ад прэзідэнта неадкладна адмяніць ваеннае становішча.

14 снежня парламент прагаласаваў за імпічмент Юна Сок Ёля. Ён быў афіцыйна адхілены ад улады, а пазней арыштаваны і аддадзены пад суд.