У мінскай Чыжоўцы здарыўся пажар

• 13.01.2026, 22:30

Загінула жанчына.

У жылым доме на вул. Галадзеда ў Мінску вечарам 13 студзеня здарыўся пажар.

Ратавальнікі ўжо патушылі агонь, падрабязнасці паведамілі ў прэс-службе МНС.

Пра ўзгаранне стала вядома дзякуючы сістэме перадачы паведамленняў пра НС «Маланка». Сігнал спрацаваў на першым паверсе, дзе размешчаны крамы.

Ратавальнікі неадкладна прыбылі на месца здарэння. Высветлілася, што ў саміх гандлёвых памяшканнях агню няма, аднак было нязначнае задымленне.

Персанал аб’екта і супрацоўнікі МНС эвакуявалі 30 чалавек, 5 з якіх — дзеці. Ніхто з іх не пацярпеў.

Аднак трагічны бок інцыдэнту стаў вядомы пазней. Далейшая разведка паказала, што ўзгаранне адбываецца з тыльнага боку жылога дома, у падвале.

Падчас тушэння агню ратавальнікі выявілі жанчыну. У МНС адзначылі, што яна была без прытомнасці. Пацярпелую вынеслі на свежае паветра.

Пасля агляду работнікі хуткай медыцынскай дапамогі канстатавалі смерць жанчыны.

Прычына пажару і абставіны здарэння высвятляюцца, дадалі ў ведамстве.