У Беларусі зацвердзілі наваўвядзенне для тых, каго накіроўваюць вучыцца за мяжу

• 13.01.2026, 18:55

Трэба падпісаць спецыяльны дакумент.

Міністэрства адукацыі зацвердзіла новыя правілы адбору кандыдатаў для навучання і стажыровак за мяжой у межах міждзяржаўных пагадненняў Беларусі. Адпаведная пастанова вызначае, хто менавіта зможа прэтэндаваць на такія накіраванні.

Паехаць вучыцца за мяжу па міжнародных праграмах змогуць выпускнікі 11-х класаў — ім прапануецца навучанне па праграмах бакалаўрыяту. Таксама ў спіс патэнцыйных удзельнікаў уключаны студэнты беларускіх вышэйшых навучальных устаноў, якіх могуць накіраваць за мяжу для праходжання стажыровак.

Сярод асноўных патрабаванняў — валоданне замежнай мовай на ўзроўні, які дазваляе паўнавартасна вучыцца або праходзіць стажыроўку. Акрамя таго, кандыдат павінен мець сярэдні бал паспяховасці не ніжэй за 8 і падпісаць пісьмовае абавязанне аб вяртанні ў Беларусь пасля завяршэння навучання.

Для ваеннаабавязаных прадугледжана дадатковая ўмова: неабходна прадставіць дакумент, які пацвярджае адтэрміноўку або вызваленне ад прызыву на перыяд знаходжання за мяжой.

Пры разглядзе кандыдатур камісія будзе ўлічваць удзел абітурыентаў і студэнтаў у прадметных алімпіядах, іх дасягненні, а таксама вынікі па профільных дысцыплінах.

У міністэрстве падкрэслілі, што гэтыя правілы не распаўсюджваюцца на тых, хто паступае ў замежныя навучальныя ўстановы самастойна, без удзелу дзяржаўных праграм.