Узброеныя сілы Украіны сарвалі план Расіі выйсці да Адэсы

• 13.01.2026, 14:38

Галоўнакамандуючы Сырскі распавёў падрабязнасці.

Мінулы год стаў сур'ёзным выпрабаваннем для Украіны, бо Расія імкнулася завяршыць вайну на сваіх умовах — шляхам ваеннага разгрому.

Пра гэта паведамляе РБК-Украіна са спасылкай на галоўнакамандуючага Узброеных Сіл Украіны Аляксандра Сырскага.

Паводле яго слоў, вораг спрабаваў захапіць астатнія тэрыторыі Данецкай, Луганскай і Запарожскай абласцей, правабярэжжа Херсоншчыны, а таксама планаваў выйсці да Адэсы, каб цалкам адрэзаць Украіну ад Чорнага мора.

«Мы не дапусцілі крытычных прарываў ворага, сарвалі яго планы, неаднаразова змушалі пераносіць тэрміны спланаваных аперацый», — заявіў Сырскі.

Галоўнакамандуючы падкрэсліў, што ўкраінскія воіны працавалі на мяжы магчымасцяў і наносілі расійскай арміі максімальныя страты. На працягу года колькасць сіл ворага была скарачана больш як на 418 тысяч чалавек — забітых і параненых.

«Гэты год даказаў: мы здольныя сістэмна знясільваць ворага і адчувальна змяншаць яго патэнцыял. Сілы абароны не далі агрэсару рэалізаваць яго планы, захавалі стратэгічныя пазіцыі і падрыхтавалі аснову для далейшых дзеянняў», — адзначыў галоўнакамандуючы.