Навукоўцы распавялі, якія рысы твару мужчын прыцягваюць жанчын

• 13.01.2026, 11:56

Гэта зусім не мачо.

Вобраз мускулістага мачо з суровым позіркам можа камусьці здавацца эталонам мужчынскай прывабнасці. Аднак існуе розніца паміж вобразам абаронцы і вобразам патэнцыйна небяспечнага суб’екта. Новае даследаванне групы кітайскіх навукоўцаў паказала, што жанчын, як правіла, прыцягваюць толькі тыя традыцыйна мужчынскія рысы твару, якія яны не асацыююць з агрэсіўнасцю, піша «Нож».

Эвалюцыйныя псіхолагі з Паўднёва-Заходняга ўніверсітэта ў Чунцыне і Шэньсійскага педагагічнага ўніверсітэта захацелі зразумець, як жанчыны балансуюць паміж цягаю да маскуліннай эстэтыкі і жаданнем мінімізаваць рызыкі пры сустрэчы з патэнцыйным партнёрам.

Навукоўцы правялі серыю эксперыментаў, у якіх узялі ўдзел больш за 300 дзяўчат: удзельніц знайшлі ў сацыяльных сетках.

Для першага эксперыменту каманда папярэдне апрацавала серыю мужчынскіх фотапартрэтаў. З дапамогай спецыяльнага алгарытму яны вызначылі характэрныя рысы кожнага твару, пасля змянілі іх, каб частка герояў выглядала больш канвенцыйна мужчынна, а іншая — крыху больш фемінна. У выніку псіхолагі стварылі пары партрэтаў, твары на якіх адрозніваліся па форме, але захоўвалі рысы зыходнага здымка.

Удзельніцы разглядалі пары партрэтаў і выбіралі адно з двух абліччаў: тое, якое падалося ім больш прывабным.

Папярэднія вынікі паказалі наступнае: калі твар чалавека здаваўся дзяўчатам празмерна суровым, яны аддавалі перавагу больш фемінізаванай версіі твару. Паводле дадзеных навукоўцаў, гэта адбывалася незалежна ад таго, ці лічылася зыходнае аблічча прыгожым або непрыкметным.

Другі эксперымент нагадваў першы, але гэтым разам жанчын прасілі ўявіць, ці маглі б яны пагадзіцца на раман або доўгатэрміновыя адносіны з мужчынам, які мае пэўныя рысы твару. У апошнім эксперыменце жанчыны таксама ацэньвалі фотапартрэты па шкалах «прывабнасць», «агрэсіўнасць» і «мужчыннасць».

Статыстычны аналіз паказаў, што наяўнасць традыцыйна мужчынскіх рыс твару станоўча карэлюе з высокай ацэнкай прывабнасці, аднак узаемасувязь залежыць ад паказчыка па шкале агрэсіўнасці. Калі мужчына выглядаў празмерна сурова, то гэтая рыса значна менш уплывала на яго прывабнасць.

«Гэта даследаванне падкрэслівае важнасць мімікі для фармавання пераваг у дачыненні да палавых дыёмарфізмаў», — зрабілі выснову даследчыкі.