Вольфовіч правёў сеанс псіхатэрапіі для Лукашэнкі

• 12.01.2026, 22:32

Дзяржсакратар Савета бяспекі паспрабаваў супакоіць дыктатара, кажучы пра венесуэльскі сцэнар у Беларусі.

Дзяржсакратар Савета бяспекі Аляксандр Вольфовіч заявіў, што сцэнар Венесуэлы ў Беларусі нібыта нерэальны, паведаміў тэлеканал «Першы інфармацыйны».

Раней Аляксандр Лукашэнка таксама спрабаваў патлумачыць, чаму ў Беларусі не пройдзе венесуэльскі сцэнар: «Нават калі гэта адбудзецца, у нас усё на гэты выпадак прадугледжана».

А цяпер дзяржсакратар Савета бяспекі зрабіў заяву пра тое, што венесуэльскі сцэнар немагчымы ў Беларусі, бо сілавікі Лукашэнкі нібыта не здольныя на здраду. І звярнуў увагу на тое, што ў Венесуэле ў большай ступені спрацаваў фактар здрады ў дачыненні да дыктатара і дзейнай улады.

– Вось так бязсаромна, бяспечна праляцець па тэрыторыі чужой дзяржавы верталётамі і, не атрымаўшы ніякіх, скажам так, нават папераджальных стрэлаў, — гэта проста немагчыма, — пракаментаваў ён.

Акрамя таго, ён указаў на тое, што ў краіне існуе інстытут Савета бяспекі, прыняты ўсе заканадаўчыя дакументы, якія дазваляюць не страціць кіравання краінай.

Падсумоўваючы, Вольфовіч таксама выказаў упэўненасць у тым, што прынятыя заканадаўчыя акты і не спатрэбяцца, бо ў беларусаў іншы менталітэт.