Прэзідэнт Малдовы: Калі б мы правялі рэферэндум, я б прагаласавала за аб’яднанне з Румыніяй

• 12.01.2026, 19:13

У той жа час Мая Санду назвала больш рэалістычнай мэтай сябраства Кішынёва ў ЕС.

Прэзідэнт Малдовы Мая Санду у падкасце The Rest Is Politics: Leading прызналася, што на патэнцыйным рэферэндуме прагаласавала б за аб’яднанне краіны з Румыніяй.

«Калі б мы правялі рэферэндум, я б прагаласавала за аб’яднанне з Румыніяй», — заявіла Санду.

Сваю пазіцыю яна патлумачыла геапалітычнай сітуацыяй вакол Малдовы і ў свеце ў цэлым. Паводле яе слоў, такой краіне, як Малдова, «становіцца ўсё складаней выжываць, існаваць як дэмакратыя і суверэнная дзяржава».

У той жа час Санду падкрэсліла, што сёння ў рэспубліцы няма большасці, якая падтрымала б аб’яднанне з Румыніяй. Прэзідэнт назвала больш рэалістычнай мэтай сябраства Кішынёва ў ЕС, і гэта дапамагае «абароняць суверэнітэт».

Да гэтага прэзідэнт Румыніі Нікушор Дан заявіў, што жадае аб’яднання з Малдовай, але цалкам паважае волю грамадзян суседняй рэспублікі. Дан заявіў, што на дадзены момант каля 35% грамадзян Малдовы падтрымліваюць ідэю аб’яднання дзвюх краін.

«Пакуль значная частка насельніцтва суседняй краіны падтрымлівае цяперашнюю форму дзяржаўнага ладу, Румынія не зробіць ніякіх крокаў», — заключыў румынскі лідар.