У Белгарадзе з-за маштабнага блэкаўту пачалі закрывацца гандлёвыя цэнтры
- 12.01.2026, 17:35
Масава адключаюцца і вышкі сотавай сувязі.
У Белгарадзе на фоне маштабных адключэнняў электразабеспячэння, якія адбыліся пасля ракетнага ўдару ЗСУ па энергетычнай інфраструктуры рэгіёна, пачалі закрывацца гандлёвыя цэнтры і масава адключацца вышкі сотавай сувязі. Пра гэта паведамляе The Moscow Times са спасылкай на «Попел Белгарада». Паводле канала, 12 студзеня пра прыпыненне працы паведамілі як мінімум тры буйныя гандлёвыя цэнтры ў абласным цэнтры.
У ТРЦ «РИО» абвясцілі, што ў панядзелак будуць працаваць толькі гіпермаркет «Ашан» і аптэка. Прычына нязручнасцяў — «рамонтныя працы» і «абмежаванні на спажыванне электраэнергіі», адзначылі ў прэс-службе. Кіраўніцтва «Сіці Мола» таксама паведаміла пра закрыццё большай часткі крамаў і кафэ ў гандлёвым цэнтры «па тэхнічных прычынах». Там функцыянуюць толькі «Пяцёрочка», кінатеатр, пляцоўка для падэл-тэніса і яшчэ некалькі крамаў. «Паважаныя наведвальнікі, інфармацыя пра заўтра… будзе заўтра. Такія цяпер часы», — паведамілі ў тэлеграм-канале ТЦ. Пра абмежаванні таксама паведамілі ў ТЦ «МегаГрынн». Комплекс амаль поўнасцю прыпыніў працу па прычыне недахопу энергіі.
Мінулую пятніцу ўкраінскія войскі нанеслі ракетны ўдар па падстанцыі «Сторожевая» і ЦЭЦ «Луч», якія забяспечваюць электразабеспячэнне значнай часткі Белгарада. У выніку атакі больш за 550 тысяч жыхароў вобласці засталіся без святла і цяпла, паведамляў губернатар Вячаслаў Гладкоў. Яшчэ каля 200 тысяч чалавек пазбавіліся вады.
Акрамя праблем у гандлёвых цэнтрах Белгарада, у вобласці на фоне блэкаўту было абмежавана спажыванне электраэнергіі на прамысловых прадпрыемствах, з-за чаго апошнія могуць працаваць толькі ў начны час. Паводле «Попелу», гэта закранула больш за 60 вытворчасцяў горада.
Маштабныя перабоі з электрычнасцю таксама прывялі да таго, што ў Белгарадскай вобласці перасталі функцыянаваць больш за 60% вышак сотавай сувязі, распавёў падчас аператыўнай нарады ўрада кіраўнік Мінлічбы вобласці Сяргей Чацвярыкоў. Гэта каля трох тысяч базавых станцый. Прыборы на вышках могуць працаваць аўтаномна да шасці гадзін, патлумачыў чыноўнік. Паводле яго слоў, пасля блэкаўту аператары сувязі не падключылі станцыі да рэзервовых генератараў, у выніку чаго яны адключыліся.
Гладкоў са свайго боку анансаваў пошук «правакатараў» сярод незадаволеных рэакцыяй уладаў на адключэнні электраэнергіі белгарадцаў і даручыў правесці адпаведны маніторынг жыхароў рэгіёна.