ЗША могуць часткова зняць санкцыі з Венесуэлы

• 12.01.2026, 6:04

Паслабленне абмежаванняў дазволіць Каракасу вярнуць выручку ад продажу нафты.

Адміністрацыя ЗША разглядае магчымасць частковага зняцця санкцый з Венесуэлы ўжо на наступным тыдні, перш за ўсё для палягчэння экспарту і продажу нафты. Пра гэта паведаміў міністр фінансаў ЗША Скот Бессент у размове з Reuters.

Па словах Бессента, на наступным тыдні ён таксама плануе сустрэцца з кіраўнікамі Міжнароднага валютнага фонду і Сусветнага банка для абмеркавання аднаўлення супрацоўніцтва з Венесуэлай.

Акрамя таго, валютныя актывы рэспублікі ў МВФ на суму каля 5 мільёнаў долараў могуць быць выкарыстаны для аднаўлення венесуэльскай эканомікі.

Канкрэтныя санкцыі, якія могуць быць скасаваныя, міністр не ўдакладніў. Паводле дадзеных агенцтва, цяпер Міністэрства фінансаў ЗША вывучае змены, якія дазволяць вярнуць Венесуэле выручку ад продажу нафты, якая захоўваецца пераважна на танкерах.