Брытанія вырабіць для Украіны ракеты з далёкасцю палёту 500 км

• 11.01.2026, 21:08

Вытворчасць Лондан мае намер пачаць у найбліжэйшы час.

Вялікабрытанія мае намер у найбліжэйшы час пачаць вытворчасць для Украіны ракет Nightfall, далёкасць палёту якіх дасягае 300 міль (прыкладна 500 км). Як паведамляе Daily Mail са спасылкай на міністра абароны Джона Хілі, цяпер Міністэрства абароны Вялікабрытаніі займаецца пошукам кампаній, якія вырабяць першыя тры ракеты на агульную суму 9 млн фунтаў стэрлінгаў.

Паводле розных ацэнак, Nightfall зможа несці да 300 кг выбухоўкі і будзе крыху цяжэйшая за амерыканскую ATACMS. Пры гэтым чакаецца, што каштаваць яна будзе танней.

Перавагай сістэмы, пра якую ўпершыню стала вядома ў жніўні, называюць высокую хуткасць. Ад моманту пуску да прыляту, як мяркуецца, павінна прайсці не больш за 10 хвілін. Пры гэтым экіпаж пускавой устаноўкі зможа змяніць месца дыслакацыі на працягу пяці хвілін.

Яшчэ адной вартасцю Nighfall называюць яе дакладнасць. Дзякуючы навядзенню з дапамогай сістэмы GPS памылка месца траплення павінна складаць не больш за пяць метраў.

Акрамя Nightfall брытанцы таксама маюць намер вырабляць для Украіны дроны Octopus, якія павінны будуць перахопліваць расійскія беспілотнікі.