Беларуска ўстанавіла сусветны рэкорд, здзейсніўшы самы высокі скок у скайсёрфінгу над Гімалаямі

• 11.01.2026, 17:53

Відэафакт.

Беларуская спартсменка Вольга Наўмова увайшла ў гісторыю экстрэмальных відаў спорту, здзейсніўшы скок з дошкай (скайсёрфінг) з рэкорднай вышыні ў высокагорнай зоне Эверэста. Яе дасягненне афіцыйна зафіксавана Кнігай рэкордаў Гінеса як самы высокі скок у дысцыпліне sky surfing, перадае «Зеркало».

Скок быў выкананы 10 лістапада ў Непале, у раёне Сьянгбочэ. Верталёт, на борце якога знаходзілася спартсменка, падняўся на вышыню 20 945 футаў (6384 метры) — вышэй, чым калі-небудзь раней уздымаліся ўдзельнікі падобных скачкоў. Адтуль беларуска здзейсніла свабоднае падзенне, кіруючы дошкай у экстрэмальных умовах высокагор'я.

Скайсёрфінг — гэта экстрэмальны від спорту, які ўзнік у канцы ХХ стагоддзя. Ён спалучае ў сабе элементы парашутнага спорту, сёрфінгу і сноўбордынгу. Спартсмены выконваюць скокі, калі ногі прыстёгнутыя да спецыяльнай лёгкай дошкі, робяць вярчэнні, трукі і манеўры ў паветры, а затым раскрываюць парашут для бяспечнага прызямлення.

Вольга Наўмова — 15 гадоў у скайсёрфінгу і адна з самых вопытных спартсменак у гэтым напрамку. За яе плячыма — больш за 17 тысяч скачкоў. Тым не менш, нават для яе гэты рэкорд стаў сур'ёзным выпрабаваннем: раней ніхто з людзей не здзяйсняў свабоднага падзення з дошкай з такой вышыні.

Нягледзячы на экстрэмальныя ўмовы, беларуска здолела захаваць кантроль над дошкай, справіцца з моцнымі патокамі паветра і паспяхова раскрыць парашут. Прызямленне адбылося на вышыні 12 356 футаў (3766 метраў) — на ўзлётна-пасадачнай паласе.

«З таго моманту, як я адкрыла для сябе скайсёрфінг, маёй марай было выканаць сапраўды ўнікальны скок і натхніць дзяўчат ва ўсім свеце не баяцца быць смелымі і марыць маштабна», — пракаментавала сваё дасягненне Наўмова.