У Мінску з-за моцнага марозу ўзнікла рэдкая аптычная з'ява

• 11.01.2026, 12:15

Яе выклікаў так званы алмазны пыл.

У Мінску з-за моцнага марозу ўзнікла рэдкая аптычная з'ява — святловыя слупы, піша тэлеграм-канал nadvorie.

«Прычына крыецца ў адлюстраванні мясцовых крыніц святла ад драбнюткіх ледзяных крышталікаў, якія фармуюцца з вадзянога пару, што ўтрымліваецца ў паветры. Крышталікі ўяўляюць сабой драбнюткія ледзяныя іголкі або зусім мікраскапічныя часцінкі, так званы алмазны пыл», — патлумачылі ў пабліку.

З'ява звычайна назіраецца пры тэмпературах ад мінус 15 да мінус 25 градусаў, пры антыцыклонным надвор'і, пры праясненнях, пры шціле або слабым ветры, пад стрымлівальным пластом — інверсіяй тэмпературы.

«Увогуле, паветра нерухомае, холад трымаецца, вадзяная пара не ведае, куды дзецца, і крышталізуецца на месцы», — патлумачылі ў nadvorie.

Нагадаем, цыклон «Уллі», які прыйшоў у нашу краіну вечарам 8 студзеня, стаў рэкордным па колькасці ападкаў і прынёс нізкія тэмпературы. Найбольшы снежны покрыў, як паведамляе nadvorie, быў у Оршы і Плешчаніцах — 46 см. А найхаладней за ўсё ў ноч на 11 студзеня было на поўначы Мінскай вобласці — мінус 22,3 градуса.