Белгарадцы мыюцца ў снезе: улады РФ пацярпелі правал у спробе вывесці рэгіён з блэкаўту
- 10.01.2026, 20:41
Улады Белгарадскай вобласці не змаглі аднавіць электра-, цепла- і водазабеспячэнне.
Белгарад працягвае знаходзіцца ў зацяжным камунальным крызісе пасля ракетнай атакі Узброеных сіл Украіны. Мясцовыя жыхары скардзяцца на адсутнасць святла, вады і цяпла, а губернатар заклікае іх набываць генератары і самастойна вырашаць праблему з адсутнасцю электрычнасці, паведамляе dialog.ua.
Без камунальных паслуг ужо другія суткі застаюцца, паводле розных ацэнак, да трэці жыхароў Белгарадскай вобласці. Атака адбылася ноччу на 9 студзеня. У выніку удараў па аб’ектах энергетычнай інфраструктуры ў Белгарадзе і шэрагу раёнаў вобласці знікла электрычнасць.
Адразу пасля атакі белгарадскі губернатар Вячаслаў Гладкоў паведаміў, што без электрычнасці засталіся 556 тысяч чалавек у шасці муніцыпалітэтах рэгіёна. Амаль столькі ж жыхароў засталіся без ацяплення, яшчэ каля 200 тысяч — без водазабеспячэння. Сітуацыю кіраўнік рэгіёна ахарактарызаваў як «надзвычай складаную», заявіўшы пра спробы пераключыць частку спажыўцоў на рэзервовыя крыніцы сілкавання.
Аднак, паводле паведамленняў саміх белгарадцаў у сацыяльных сетках, наступствы аказаліся куды цяжэйшымі. Шмат хто паведаміў, што не можа гатаваць ежу, зараджаць тэлефоны і карыстацца ліфтамі ў шматпавярховых дамах. Каб забяспечыць сябе вадой, людзі пачалі тапіць снег проста ў кватэрах. Ля заправачных станцый і банкаматаў выстроіліся чэргі, піша «Агенцтва».
У пятніцу ўдзень губернатар паабяцаў вырашыць праблему да канца дня. Гэтыя словы пацвердзіў і абласны аператыўны штаб.
Аднак стрымаць абяцанне ўладам не ўдалося. Пра аднаўленне падачы вады ў паўночнай частцы Белгарада «Водаканал Белгарадскай вобласці» паведаміў толькі каля 11:30 наступнага дня. Амаль адразу пасля гэтага ведамства абвясціла пра новае адключэнне вады ў адным з раёнаў горада і ў шэрагу вёсак, а таксама пра адключэнне электрычнасці на аб’екце водазабеспячэння ў Шэбекіне.
Раніцай у суботу губернатар зноў выступіў са заявай пра працяг аварыйна-аднаўленчых работ. Пры гэтым з яго публікацыі не вынікала, у якіх менавіта раёнах падача святла і вады ўжо адноўлена, а дзе праблемы захоўваюцца. Гладкоў даў зразумець, што поўнавартаснае аднаўленне электразабеспячэння можа заняць працяглы час.
Пры гэтым губернатар фактычна ўсклаў частку адказнасці за наступствы адключэнняў на саміх жыхароў рэгіёна. Паводле яго слоў, многія хатнія гаспадаркі маглі загадзя набыць генератары, але не зрабілі гэтага, спадзеючыся, што крызіс іх не закране.
Гэтыя словы ўладаў выклікалі раздражненне ў жыхароў рэгіёна. Яны скардзяцца на нізкія заробкі і, як вынік, адсутнасць фінансавых магчымасцяў для набыцця генератараў, а таксама лічаць недапушчальным перакладанне адказнасці за працу крытычнай інфраструктуры на насельніцтва.
Тым часам на адным з відэа жанчына паказвае, як топіць снег у кватэры, каб такім чынам забяспечыць сябе вадой.
— Спонсар нашага сённяшняга паходу ў туалет і начнога мыцця — снегавік, — сказала яна.