Лаўрэат Нобелеўскай прэміі хоча «падзяліцца» ўзнагародай з Трампам

• 10.01.2026, 18:59

У Нарвежскім Нобелеўскім камітэце адрэагавалі.

Лідар венесуэльскай апазіцыі Марыя Карына Мачада заявіла пра жаданне «падзяліцца» сваёй Нобелеўскай прэміяй міру з прэзідэнтам ЗША Дональдам Трампам.

Аднак у Нарвежскім Нобелеўскім камітэце адзначылі, што гэтага нельга зрабіць.

- Пасля абвяшчэння (аб прысуджэнні. – Рэд.) Нобелеўскай прэміі яе нельга адмяніць, падзяліць або перадаць іншым асобам. Рашэнне з’яўляецца канчатковым і застаецца ў сіле назаўжды, – гаворыцца ў тлумачэнні камітэта, які і прысуджае прэмію міру.

Раней, 6 студзеня, лідар апазіцыі Венесуэлы заяўляла, што хоча «падзяліцца» ўзнагародай з Трампам. Гэта адбылося пасля таго, як 3 студзеня Амерыка правяла вайсковую аперацыю ў Венесуэле і арыштавала дыктатара краіны Нікаласа Мадуру і яго жонку.

У кастрычніку 2025-га, пасля прысуджэння ўзнагароды, Мачада прысвяціла яе свайму народу і кіраўніку Штатаў. Апошні неаднаразова заяўляў, што хоча атрымаць Нобелеўскую прэмію міру.

Ужо 8 студзеня Трамп расказаў у інтэрв’ю тэлеканалу Fox News, што плануе сустрэцца з Мачадай на наступным тыдні.

Прэзідэнт ЗША адзначыў, што ведае пра яе намер «падзяліцца» прэміяй, і што гэта будзе «вялікі гонар».