У Германіі тры невядомыя дроны перахітрылі сістэму Arrow 3, якая перахоплівае «Арэшнік»
- 10.01.2026, 11:39
Інцыдэнт у Берліне кваліфікавалі як наўмысны шпіянаж.
Германія сутыкнулася з сур’ёзным прабелам у бяспецы пры разгортванні адной з ключавых сістэм супрацьракетнай абароны Еўропы — ізраільскай Arrow 3, прызначанай, у прыватнасці, для перахопу расійскага комплексу «Арэшнік».
Як паведамляе Defense Romania, за два дні да афіцыйнага ўводу сістэмы ў пачатковую баявую гатоўнасць над радыёлакацыйнай станцыяй Arrow 3, разгорнутай на авіябазе паблізу горада Аннабург у федэральнай зямлі Саксонія-Ангальт, былі зафіксаваныя тры невядомыя беспілотнікі. Яны ляталі на вышыні каля 100 метраў непасрэдна над РЛС, якая з’яўляецца ключавым элементам сістэмы.
Да месца здарэння аператыўна прыбыло падраздзяленне хуткага рэагавання Бундэсвера. Ваенныя змаглі ўстанавіць візуальны кантакт з дроном з дапамогай уласнага БПЛА і паспрабавалі перахапіць парушальнікаў. Для гэтага выкарыстоўвалі штурмавыя вінтоўкі G27P з ізраільскімі «разумнымі» прыцэламі Smash X4, якія пазыцыянуюцца як эфектыўны сродак барацьбы з дронамі. Аднак ніводнага з беспілотнікаў збіць не ўдалося — яны зніклі з раёна.
Пасля расследавання нямецкая контрвыведка і вайсковая паліцыя класіфікавалі інцыдэнт як «наўмысны шпіянаж». Эксперты звяртаюць увагу, што гаворка ідзе пра сістэму коштам больш за 3,5 мільярда долараў, якая фактычна з’яўляецца адным з нешматлікіх элементаў абароны Еўропы ад міжкантынентальных балістычных ракет.
Хоць стратэгічныя аб’екты звычайна прыкрываюцца шматслаёвай СПА, у дадзеным выпадку абарона, верагодна, яшчэ не была цалкам разгорнутая, паколькі сістэма толькі ўводзілася ў эксплуатацыю. Адначасова аналітыкі адзначаюць, што менавіта Расія можа быць зацікаўленым бокам, бо за апошнія гады невядомыя дроны неаднаразова фіксаваліся над адчувальнымі аб’ектамі ў розных краінах Еўропы.
Спецыялісты папярэджваюць: калі супрацьдронавая абарона такіх сістэм не будзе істотна ўзмоцненая, то ў выпадку прамога канфлікту паміж РФ і Еўропай Arrow 3 можа стаць адной з першых мэтаў, пры гэтым для яе вываду са строю могуць спатрэбіцца не дарагія ракеты, а некалькі танных беспілотнікаў. Рызыка ўзмацняецца тым, што радыёлакацыйная станцыя Arrow 3 з’яўляецца стацыянарнай, а яе каардынаты вядомыя загадзя.
Нягледзячы на першае разгортванне ў 2025–2026 гадах, поўнай баявой гатоўнасці Arrow 3 у Германіі чакаюць толькі ў 2030 годзе. У той жа час Берлін плануе наладзіць лакальную вытворчасць ракет-перахопнікаў і дадаткова закупіць яшчэ некалькі такіх сістэм на суму каля 3 мільярдаў еўра.
Што вядома пра Arrow 3
У снежні стала вядома, што Германія можа падпісаць новую дамову з Ізраілем аб пашырэнні кантракта на пастаўку сістэмы супрацьракетнай абароны Arrow 3 і ракет-перахопнікаў да яе. Сума кантракта можа скласці 3 млрд еўра.
Кантракт па Arrow 3 паміж Іерусалімам і Берлінам прадугледжвае, што бакі могуць разгарнуць сумесную вытворчасць ракет у Германіі, хутчэй за ўсё, на магутнасцях MBDA Deutschland, аднак афіцыйна пра гэта не паведамлялася.