Новая праца Бэнксі з’явілася на будынку Вышэйшага суда Лондана

• 8.09.2025, 16:51

Загадкавы вулічны мастак зноў прыцягнуў да сябе ўвагу ўсяго свету.

Праца паказвае суддзю ў традыцыйным парыку і чорнай мантыі, які наносіць удар па пратэстоўцу, што ляжыць на зямлі. На плакаце пратэстоўца бачны сляды крыві, піша BBC (пераклад — сайт Charter97.org).

Хоць мурал не адсылае да канкрэтнай падзеі, яго з’яўленне супала па часе з масавымі затрыманнямі ў брытанскай сталіцы. Два дні таму паліцыя арыштавала каля 900 чалавек падчас акцыі пратэсту.

Ужо праз некалькі гадзін пасля з’яўлення малюнка яго закрылі пластыкавымі палатнінамі і металічнымі агароджамі. Цяпер мурал ахоўваюць супрацоўнікі службы бяспекі, а над ім усталяваная камера відэаназірання.

Сам Бэнксі пацвердзіў аўтарства, апублікаваўшы фота працы на сваёй старонцы ў Instagram.

Малюнак размешчаны на вонкавай сцяне Каралеўскага корпуса, які ўваходзіць у комплекс будынкаў Вышэйшага суда.

Творчасць Бэнксі традыцыйна вылучаецца вострай крытыкай улады, вайны і капіталізму. Мінулым летам мастак рэалізаваў у Лондане кампанію з дзевяці «жывёльных» прац: сярод іх — гарыла, што прыпадымае рашотку на ўваходзе ў Лонданскі заапарк, піранні ў паліцэйскай будцы ў Сіці і воўк, намаляваны на спадарожнікавай талерцы ў Пекхэме. Апошнюю працу дэмантавалі менш як праз гадзіну пасля яе з’яўлення.