Затрыманы дырэктар аршанскага аэрадрома?

• 8.09.2025, 15:54

За злоўжыванне службовым становішчам.

Нядаўна была ўзбуджаная крымінальная справа ў дачыненні да кіраўніка аднаго з транспартных прадпрыемстваў Оршы. Яму інкрымінуецца выкарыстанне працы сваіх падначаленых для будаўніцтва прысядзібнага дома і лазні.

Работнікі (а колькасць прыцягнутых дайшла да 16 чалавек) працавалі нават у выхадныя — за кошт дзяржавы. Шкоду прадпрыемству ацанілі больш як у 92 тысячы рублёў.

Пад апісанне (супаў год нараджэння — 1962-і) падыходзіць Мікалай Чэрвінскі, які з 2021 года ўзначальвае аэрадром «Орша» (філіял Нацыянальнага аэрапорта), адзначае тэлеграм-канал «Віцебск, я гуляю».

У яго вайсковая кар'ера, ён палкоўнік запасу, які аддаў Узброеным Сілам Рэспублікі Беларусь больш за 30 гадоў. Сышоў у запас са штаба камандавання сухапутных войскаў.

У сацсетках Мікалай Чэрвінскі апошні раз з'яўляўся 19 жніўня, хоць там ён вядзе даволі актыўнае жыццё. З вялікай доляй верагоднасці менавіта ён стаў падазраваным па справе аб злоўжыванні службовым становішчам.