Працаваць усё цяжэй, а сілаў становіцца менш

• 8.09.2025, 10:48

Беларусы — пра магчымасць павышэння пенсійнага ўзросту для жанчын да 63 гадоў.

З 2025 года ў Беларусі могуць павысіць пенсійны ўзрост для жанчын да 63 гадоў. Такім чынам, мужчыны і жанчыны будуць выходзіць на пенсію адначасова. Улады тлумачаць гэта «павелічэннем працягласці жыцця».

Ex-press.by сабраў меркаванні людзей з розных сфер — ад настаўнікаў і айцішнікаў да актывістак і пенсіянераў.

Валянціна, 58 гадоў, настаўніца:

— Я ўжо амаль лічу дні да пенсіі, а цяпер выходзіць, што трэба чакаць яшчэ даўжэй. Працаваць у школе ўсё цяжэй, ды і сілаў становіцца менш. Хацелася б, каб улічвалі здароўе, а не толькі лічбы.

Сяргей, 35 гадоў, айцішнік:

— Людзі жывуць даўжэй — лагічна, што і пенсійны ўзрост расце. Але важна, каб пажылыя маглі сапраўды працаваць, а не проста лічыцца, знясіленыя нагрузкай.

Марыя, 44 гады, медсястра:

— Для жанчын гэта вельмі цяжка. Мы і так працуем і на працы, і дома. Пасля змены яшчэ гаспадарка і сям'я. У 63 гады трэба мець жалезнае здароўе, каб усё цягнуць.

Мікалай, 71 год, пенсіянер:

— Я ўжо на пенсіі, з 60, але калі б мне давялося працаваць да 63, не вытрымаў бы. Працаваў на КЗТШ, праца была цяжкая, вырваўся — шчаслівы быў. Складаецца ўражанне, што дзяржава проста хоча плаціць менш.

Анастасія, 29 гадоў:

— Думаю пра будучыню і разумею: калі да 63 пахаць, потым ужо і сілаў ні на што не застанецца. Хочацца пажыць для сябе, а не толькі працаваць.

Галіна, 62 гады, бібліятэкарка:

— Атрымліваецца, што мне да пенсіі яшчэ год? Не скажу, што прыемны сюрпрыз… Вядома, крыўдна. Але я люблю сваю працу, калі здароўе дазволіць, дапрацую.

Андрэй:

— Пенсія павінна быць справай выбару. Хто хоча — няхай працуе. Хто стаміўся і набыў стаж, павінен мець магчымасць сысці раней. Універсальныя лічбы несправядлівыя.

Вольга:

— Роўны пенсійны ўзрост гучыць прыгожа, але на справе гэта няроўнасць. Жанчыны ўсё жыццё працуюць на два франты: і на працы, і дома. Дзяржава перакладае на нас клопат, замест таго каб ствараць умовы — бясплатныя дзіцячыя сады, справядлівыя заробкі, роўнае размеркаванне хатніх абавязкаў. Гэта не рэформа дзеля жанчын, гэта эканомія на іх жыццях.

Святлана:

— Пенсія ў 63 — гэта пакаранне за «даўгавечнасць». Але мы жывём даўжэй не таму, што нам лёгка, а таму што цягнем усё на сабе. Мужчыны паміраюць раней — няхай дзяржава думае, як палепшыць іх здароўе, а не прымушае жанчын працаваць да знясілення. Калі ўжо роўнасць, дык ва ўсім: у заробках, медыцыне, абароне ад гвалту і ў прызнанні хатняй працы як працы.