Пасля Армані: што чакае модную імперыю вялікага дызайнера

• 6.09.2025, 11:20

Ён асабіста кантраляваў і творчы, і ўпраўленчы бок бізнесу.

Смерць сусветна вядомага дызайнера Джорджо Армані, які памёр 4 верасня ва ўзросце 91 года, ставіць пытанне пра будучыню адной з самых пазнавальных модных марак свету. Створаная ім у 1970-х гадах разам з Серджо Галеоці кампанія Armani Group застаецца незалежнай — гэта прынцып, якога дызайнер трымаўся ўсё жыццё, піша агенцтва Reuters (пераклад — сайт Charter97.org).

Армані быў адзіным буйным акцыянерам брэнду і кантраляваў і творчы, і ўпраўленчы бок бізнесу да апошніх дзён. Дзяцей у яго не было, але ў справе актыўна ўдзельнічаюць яго сястра Расана, пляменніцы Сільвана і Роберта, пляменнік Андрэа Камерана і бліжэйшы паплечнік Панталео Дэлль’Орка, якіх разглядаюць як верагодных спадкаемцаў. Дадатковую яснасць унясе завяшчанне, якое неўзабаве адкрыюць.

Каб гарантаваць пераемнасць і незалежнасць брэнду, у 2016 годзе Армані заснаваў фонд, які мае адыграць ключавую ролю ў кіраванні групай. Таксама ён падрыхтаваў новыя статутныя дакументы: яны прадугледжваюць асцярожны падыход да паглынанняў і выключаюць выхад на біржу як мінімум на працягу пяці гадоў пасля яго смерці.

Нягледзячы на крызіс у індустрыі, Armani Group застаецца прывабным актывам: у 2024 годзе яе выручка склала €2,3 млрд, а чыстыя рэзервы дасягнулі €570 млн. Кампанія працягвае актыўна інвеставаць у ключавыя праекты — ад флагманскіх буцікоў у Мілане і Нью-Ёрку да новага Palazzo Armani ў Парыжы.

Галоўнай інтрыгай застаецца творчае кіраўніцтва. Сільвана Армані многія гады распрацоўвала жаночыя калекцыі, а Дэлль’Орка займаўся мужчынскімі. Эксперты мяркуюць, што будучыня кампаніі можа будавацца як вакол аднаго крэатыўнага дырэктара, так і некалькіх лідараў па накірунках — у адпаведнасці з інструкцыямі, пакінутымі заснавальнікам.

Адно ясна: Джорджо Армані прадугледзеў усё, каб яго брэнд захаваў незалежнасць і стыль, які зрабіў яго легендай.