Le Monde: За правакацыямі ў Францыі стаялі сербы, звязаныя з ГРУ

• 28.09.2025, 1:12

Яны падкідалі свіныя галовы да мячэцяў.

Французскія следчыя падазраюць, што сербская група, якая можа быць звязаная з расійскім ГРУ, стаіць за правакацыйнымі акцыямі ў Парыжы: падкідваннем свіных галоў да мячэцяў і абліваннем сінагог фарбай. Паводле звестак Le Monde, каардынаваў гэтыя дзеянні чалавек, які знаходзіўся ў Сербіі.

Чалавек з Сербіі кіраваў як абліваннем зялёнай фарбай Мемарыяла ахвяр Халакосту, двух сінагог і рэстарана ў Парыжы ў маі, так і размяшчэннем дзевяці свіных галоў каля мячэцяў у ноч на 8 верасня. На яго ўжо выдадзены еўрапейскі ордэр на арышт.

Следчыя звярнулі ўвагу на падраздзяленне 29155 ГРУ, якое раней займалася дыверсіямі і забойствамі за мяжой. На пачатку 2020-х яго ўключылі ў спецыяльнае ўпраўленне пад кіраўніцтвам генерала Андрэя Авер’янава. Паводле звестак выдання, кантакт з сербскім пасярэднікам падтрымліваўся праз Telegram, а выканаўцаў падбіралі на месцы сярод грамадзян Сербіі.

Першай акцыяй стала абліванне зялёнай фарбай Мемарыяла ахвяр Халакосту і сінагог 31 мая. Трох падазраваных сербаў затрымалі 2 чэрвеня ў прыморскім горадзе Анціб на поўдні Францыі, калі яны спрабавалі пакінуць краіну, і хутка абвінавацілі ў апаганьванні помнікаў.

Другой акцыяй было размяшчэнне свіных галоў каля дзевяці мячэцяў у парыжскім рэгіёне 8–9 верасня; некаторыя галовы былі ўпрыгожаныя лозунгамі супраць прэзідэнта Францыі Эмануэля Макрона. Паводле даных газеты Figaro, на адной з галоў было напісана «Макрон».

Расследаванне вядзецца пры падтрымцы партнёраў Францыі па «Клубе Берн» — аб’яднанне спецслужбаў 27 краін ЕС, Нарвегіі і Швейцарыі. Крыніцы Le Monde адзначаюць, што выканаўцам плацілі ўсяго некалькі сотняў еўра, што сведчыць пра нізкі прыярытэт місіі і дае магчымасць Маскве адмаўляць сваю датычнасць.