Беларускія фуры стаяць у шматкіламетровых чэргах на мяжы РФ і Казахстана

• 26.09.2025, 20:57

Мытныя службы дзвюх краін узмацнілі кантроль і праверку вантажоў.

Беларускія фуры апынуліся ў шматкіламетровых чэргах на мяжы Расіі і Казахстана. Гэта звязана з тым, што мытныя службы дзвюх краін узмацнілі кантроль і праверку вантажоў. Па словах камерцыйнага дырэктара кампаніі «Інтэр-фрэйт» Дзмітрыя Самуськова, галоўнай прычынай узмацнення праверак сталі нявырашаныя пытанні па мытных тарыфах і рознагалоссі ў энергетычнай палітыцы, піша Office.Life.

Павышаная ўвага да ўсіх вантажоў, што ідуць у Расію, прыводзіць да затрымак паставак і росту выдаткаў на лагістыку. Калі фура трапляе на праверку з экспертызай, тэрмін дастаўкі можа павялічыцца ад двух тыдняў да двух месяцаў. Пры нязначных парушэннях дакументацыі фуры накіроўваюць у горад Карабалык, які знаходзіцца за 70 км ад мяжы, для складання адміністрацыйнага пратакола.

Казахстан лічыцца самым кароткім маршрутам для дастаўкі тавараў з Кітая ў Беларусь, і тарыфы там ніжэйшыя, але цяпер рызыкі перавешваюць перавагі. Дзмітрый Самуськоў раіць часова пазбягаць гэтага маршруту і карыстацца альтэрнатывамі — праз Манголію або праз Забайкальск у Расію.

Акрамя таго, пры імпарце з Кітая патрэбны поўны пакет дакументаў яшчэ да выезду кантэйнера з Кітая. Без іх тавары могуць вяртаць, што стварае дадатковыя выдаткі да $20 тысяч. Кітайскія сертыфікаты павінны быць у арыгінале, расійскія можна падаваць у выглядзе сканаў.