У Германіі запусцяць сэрвіс аддаленага кіравання

• 25.09.2025, 10:31

Ужо з 1 снежня.

У Германіі афіцыйна дазволяць камерцыйную эксплуатацыю аўтамабіляў, якімі кіруюць аддаленыя кіроўцы. Першай кампаніяй, якая атрымае дазвол з 1 снежня, стане Vay, заснаваная ў Берліне ў 2018 годзе, піша The Guardian (пераклад — сайт Charter97.org).

У адрозненне ад звыклых робатаксі, аўтамабіль Vay дастаўляецца да карыстальніка сапраўдным кіроўцам, які кіруе ім дыстанцыйна з цэнтра кіравання. Сеўшы за стырно, кліент можа сам даехаць да патрэбнага месца, а паркоўку і зваротны выезд зноў возьме на сябе аддалены аператар.

Для кіравання выкарыстоўваюцца педалі, стырно і тры вялікія экраны, што транслююць выяву з камер аўтамабіля. Кіроўца таксама чуе гукі з вуліцы і адчувае няроўнасці дарогі дзякуючы сэнсарам. У выпадку надзвычайнай сітуацыі аўтамабіль можна імгненна спыніць націскам аварыйнай кнопкі.

Паводле слоў кіраўніка Vay Тамаса фон дэр Оэ, мэта кампаніі — зрабіць валоданне асабістым аўтамабілем непатрэбным і знізіць нагрузку на гарады. Тарыфы абяцаюць удвая ніжэйшыя, чым у цяперашніх сэрвісаў каршэрынгу.

Закон, прыняты Бундэстагам летам, дазваляе эксплуатацыю аддаленых аўтамабіляў у пэўных зонах пры ўмове выканання ўсіх нормаў бяспекі. Германія пакуль не такая смелая, як ЗША, дзе Waymo і Cruise ужо тэстуюць беспілотныя аўто, але гатовая да эксперыментаў.

Набор супрацоўнікаў праблем не выклікае: сярод новых аператараў — былыя вадзіцелі таксі, Uber і дальнабойшчыкі. «Людзі ўспрымаюць гэта як прафесію будучыні: нармальныя змены, перапынкі, праца ў камандзе», — адзначыў фон дэр Оэ.