Трамп: Краіны НАТА могуць збіваць ваенныя самалёты РФ у сваёй паветранай прасторы

• 23.09.2025, 22:16

Пра гэта кіраўнік Белага дома сказаў на прэс-канферэнцыі з прэзідэнтам Украіны.

Прэзідэнт ЗША Дональд Трамп лічыць, што краіны НАТА маюць права збіваць расійскія ваенныя самалёты ў сваёй паветранай прасторы. Ён адказаў станоўча на адпаведнае пытанне падчас сустрэчы з прэзідэнтам Украіны Уладзімірам Зяленскім на Генасамблеі ААН.

На ўдакладняльнае пытанне пра садзейнічанне ЗША саюзнікам НАТА ў падобных дзеяннях Трамп адказаў, што гэта «залежыць ад абставін». Амерыканскі прэзідэнт адзначыў, што вельмі сур'ёзна настроены адносна супрацоўніцтва з альянсам, які актыўна набывае ў ЗША зброю.

На пачатку верасня Польшча і Эстонія абвінавацілі Расію ў парушэнні сваёй паветранай прасторы. Абедзве краіны запатрабавалі кансультацый краін НАТА паводле артыкула 4 Статута альянсу — ён прадугледжвае кансультацыі членаў блока, калі адна з краін заяўляе пра пагрозу тэрытарыяльнай цэласнасці і бяспецы. Саюзнікі адзначылі, што Расія нясе адказнасць за дзеянні, якія «вядуць да эскалацыі».