Перавозчыкі пачалі вяртаць прамыя рэйсы з Беларусі ў Польшчу

• 23.09.2025, 21:22

Пасля паведамлення пра адкрыццё мяжы.

Пасля паведамлення пра адкрыццё з паўночы 25 верасня беларуска-польскай мяжы аўтобусныя перавозчыкі аднаўляюць рэйсы паміж Беларуссю і Польшчай праз пункт пропуску «Брэст», паведамляе Most.

«Атлас» абвясціў пра пачатак продажу білетаў на аўтобусы з Гродна ў Варшаву. Першы даступны рэйс адпраўляецца 25 верасня а 00:20. Таксама адкрыты продаж білетаў у зваротным напрамку.

Кошт застаўся тым самым, што дзейнічаў да закрыцця, — 150 рублёў.

Таксама пра аднаўленне рэйсаў абвясціў «Мінсктранс». Бліжэйшы рэйс па маршруце Мінск — Варшава адыходзіць з Мінска (ад аўтавакзала «Цэнтральны») 24 верасня а 19.00.

З 24 верасня 2025 года аднаўляюцца аўтобусныя пасажырскія перавозкі Ecolines па маршруце Мінск — Варшава.

Першы рэйс перавозчыка з Мінска ў Варшаву адправіцца 24 верасня а 20.00, у зваротным напрамку з Варшавы ў Мінск — 25 верасня а 21.45.

Нагадаем, 23 верасня прэм’ер-міністр Польшчы Дональд Туск абвясціў, што з паўночы 25 верасня будуць адкрытыя пункты пропуску на мяжы з Беларуссю, закрытыя з 12 верасня.