Кіраўніца прарасійскай «АдГ» нечакана рэзка раскрытыкавала Пуціна

• 23.09.2025, 14:05

Не варта выпрабоўваць цярпенне Дональда Трампа.

Кіраўніца прарасійскай партыі «Альтэрнатыва для Германіі» Аліса Вайдэль нечакана раскрытыкавала лідэра РФ Уладзіміра Пуціна. Вайдэль асудзіла правакацыі РФ у паветранай прасторы краін НАТА і заклікала Пуціна да «стрыманасці», піша BILD.

«Я лічу, што і Расія павінна паводзіць сябе дээскалацыйна, не парушаць паветраную прастору НАТА і не выпрабоўваць [натаўскія] сістэмы СПА», — сказала Вайдэль.

Яна заявіла, што такія дзеянні Расіі падрываюць мірныя намаганні прэзідэнта ЗША, папярэдзіўшы, што «не варта выпрабоўваць цярпенне Дональда Трампа. Не варта таксама дазваляць яму страціць твар у ягоных мірных намаганнях».

Яна таксама падкрэсліла, што такія дзеянні могуць прывесці да далейшай эскалацыі і будуць «пастаянна наносіць шкоду адносінам паміж Расіяй і ЗША пасля мірных ініцыятыў амерыканскага прэзідэнта».