Эстонія гатовая размясціць брытанскую ядзерную зброю на тле інцыдэнту з РФ

• 23.09.2025, 9:16

НАТА абмяркоўвае рэакцыю на парушэнне паветранай прасторы краіны.

Эстонія гатовая прыняць брытанскія F-35 з ядзерным патэнцыялам пасля парушэння паветранай прасторы РФ. Пра гэта заявіў міністр абароны краіны Ханна Пэўкур, паведамляе The Telegraph.

Гэтае рашэнне абмяркоўваецца на тле апошніх інцыдэнтаў: на мінулым тыдні тры расійскія МіГ-31 парушылі паветраную прастору Эстоніі, знаходзячыся ў межах НАТА цягам 12 хвілін.

«Дзверы заўсёды адчынены для саюзнікаў», — падкрэсліў Пэўкур, адказваючы на пытанне пра магчымасць размяшчэння F-35A.

Брытанскія знішчальнікі ўжо дыслакуюцца па чарзе на авіябазе Эмары ў межах місіі НАТА па патруляванні Балтыі, а новыя самалёты шостага пакалення чакаюцца да канца дзесяцігоддзя.

Эстонія не мае ўласных знішчальнікаў, таму на авіябазе Эмары рэгулярна нясуць службу брытанскія F-35 і Typhoon, а таксама самалёты іншых саюзнікаў. Міністр абароны падкрэсліў, што любыя дзеянні НАТА павінны быць прапарцыйнымі і прымацца ў кожным канкрэтным выпадку.

Расія адмаўляе парушэнне паветранай прасторы Эстоніі, аднак Пэўкур адзначыў, што Эстонія мае доказы і вяла кантакты з пілотамі праз радыёчастоты. Самалёты РФ былі адведзены з дапамогай італьянскіх F-35.

На гэтым тыдні НАТА праводзіць кансультацыі адносна далейшых крокаў пасля ініцыятывы Эстоніі паводле артыкула 4. Прэм’ер Польшчы Дональд Туск і міністр замежных спраў Вялікабрытаніі Івет Купер пацвердзілі гатоўнасць супрацьстаяць любым парушэнням паветранай прасторы НАТА.