Белы дом: Трамп заўтра сустрэнецца з Зяленскім

• 22.09.2025, 20:57

А таксама з лідарамі ЕС.

Прэзідэнт ЗША Дональд Трамп у аўторак, 23 верасня, сустрэнецца з прэзідэнтам Украіны Уладзімірам Зяленскім і лідарамі яшчэ дзесяці краін, паведаміла прэс-сакратарка Белага дома Кэролайн Левіт.

Па яе словах, уначы Трамп накіруецца ў Нью-Ёрк напярэдадні 80-й сесіі Генасамблеі ААН.

«У аўторак прэзідэнт выступіць з важнай прамовай пра аднаўленне сілы ЗША ў свеце, пра яго гістарычныя дасягненні ўсяго за восем месяцаў, сярод якіх — завяршэнне сямі глабальных войнаў і канфліктаў», — сцвярджае Левіт.

У Белым доме паведамілі, што Трамп таксама закране таго, як сусветныя інстытуты «сур'ёзна пашкодзілі сусветны парадак» і патлумачыць «сваё яснае і канструктыўнае бачанне для свету», — кажа прэс-сакратарка.

Прэзідэнт ЗША таксама правядзе двухбаковыя сустрэчы з Генеральным сакратаром ААН, лідарамі Аргенціны і ЕС.