У Фінляндыі стартавалі буйныя вучэнні Ваенна-паветраных сіл

• 22.09.2025, 16:12

Мэта — адпрацоўка ранняга папярэджання і перахопу БПЛА і іншых пагроз над усходняй Балтыкай.

У Фінляндыі ў панядзелак, 22 верасня, пачаліся буйныя вучэнні Ваенна-паветраных сіл, паведамляе Yle.

Як заявілі ў фінскіх Ваенна-паветраных сілах, у манеўрах, якія працягнуцца да пятніцы, возьмуць удзел прыкладна 50 самалётаў і больш за тысячу вайскоўцаў.

У вучэннях таксама задзейнічаны падраздзяленні са Швецыі і Даніі.

Акрамя асноўных авіябаз будуць выкарыстоўвацца аэрапорты Оулу, Вааса і Коккола-Піетарсаары, а таксама база Каллакс у Швецыі.

Асноўная зона вучэнняў ахоплівае тэрыторыю паміж Раваніемі, Каяані, Куопіа, Ювяскюля і Вааса, а таксама распаўсюджваецца над Ботнічным залівам.

Акрамя шуму ад самалётаў, магчымыя светлавыя эфекты, гучныя гукі і перашкоды ў працы метэарадараў, папярэдзілі ў фінскіх Ваенна-паветраных сілах.