Сабаленка захавала першую пазіцыю сусветнага рэйтынгу WTA

• 22.09.2025, 12:23

Гэта яе 49-ы тыдзень запар на вяршыні жаночага тэнісу.

Беларуская тэнісістка Арына Сабаленка 22 верасня захавала першую пазіцыю сусветнага рэйтынгу WTA. Гэта яе 49-ы тыдзень запар на вяршыні жаночага тэнісу. Такім чынам спартсменка перасягнула дасягненне румынкі Сімоны Халеп, якая ўтрымлівала лідарства 48 тыдняў.

У абноўленым спісе чатырохразовая чэмпіёнка турніраў «Вялікага шлема» набрала 11 225 ачкоў. Яе найбліжэйшая саперніца — полька Іга Свёнтэк, якая пасля перамогі на турніры ў Сеуле паменшыла адставанне на 500 ачкоў, але па-ранейшаму саступае беларусцы на 2792 ачкі.

Сярод іншых беларусак Аляксандра Сасновіч займае 130-ю пазіцыю, Вікторыя Азаранка — 137-ю.