У Краснадарскім краі РФ ракета трапіла ў жылы дом

• 22.09.2025, 9:27

«Панцыр» ударыў па сваіх.

У ноч на 22 верасня ў РФ прагрымелі выбухі. Беспілотнікі атакавалі Краснадарскі край.

Як піша расійскі Telegram-канал Astra са спасылкай на мясцовых жыхароў, фрагменты БПЛА ўпалі на тэрыторыі трох прыватных дамавалоданняў у Слаўянску-на-Кубані.

«Пашкоджаныя фасады і дахі дамоў, выбіла шыбы ў вокнах. Таксама з-за падзення абломкаў узнікла ўзгаранне травы ў прамысловай зоне. Ва ўсіх выпадках пацярпелых няма, на месцах працуюць экстраныя і аператыўныя службы», — паведаміў рэгіянальны аперштаб.

Таксама Astra піша, што разгонны блок ад расійскай ракеты ракетнага комплексу «Панцыр-С1» трапіў у жылы дом у Слаўянску-на-Кубані ў Краснадарскім краі.

Мясцовыя СМІ сцвярджаюць, што на фота нібыта зафіксаваны ўкраінскі «дрон-ракета».

Таксама паведамляецца, што ў станіцы Стародеревянковской Канёўскага раёна Краснадарскага краю з-за падзення абломкаў БПЛА адбылося ўзгаранне на электрападстанцыі.

«Пацярпелых няма. На месцы працуюць экстраныя і аператыўныя службы», — паведаміў аперштаб рэгіёна.