У Турцыі пераабраны лідар найбуйнейшай апазіцыйнай партыі

• 21.09.2025, 21:17

Пераабранне Озгюра Озэля адбылося на фоне судовага пазову.

Озгюр Озэль пераабраны лідарам найбуйнейшай апазіцыйнай партыі Турцыі — Народна-рэспубліканскай партыі (НРП) — на яе пазачарговым з'ездзе ў нядзелю, 21 верасня. Усе 835 галасоў, прызнаныя дзейснымі, былі аддадзены за яго, перадае DW.

Раней суд у Турцыі пачаў разглядаць пытанне аб ануляванні вынікаў з'езду НРП у лістападзе 2023 года, на якім Озэль быў абраны яе старшынём. У партыі лічаць, што яго пераабранне на чарговым з'ездзе павінна ліквідаваць юрыдычныя падставы для пазову супраць партыі. «Нашы юрыдычныя эксперты прымаюць найбольш адпаведныя меры супраць гэтага. З правядзеннем гэтага з'езду ўсе іх (бок абвінавачання — Рэд.) аргументы (юрыдычнага характару. — Рэд.) ліквідуюцца», — перадае словы Озгюра Озэля агенцтва AFP. Галасаванне, што адбылося, ён ахарактарызаваў як «чыста тэхнічны і юрыдычны манеўр».

Калі суд прызнае вынікі з'езду НРП несапраўднымі, Озэль можа быць адхілены ад сваёй пасады, што, у сваю чаргу, можа паўплываць на тэрміны правядзення прэзідэнцкіх выбараў Турцыі ў 2028 годзе і выклікаць перастановы ў галоўнай апазіцыйнай партыі краіны, адзначала раней агенцтва Reuters.

Напярэдадні судовага пасяджэння 15 верасня дзясяткі тысяч чалавек выйшлі на антыўрадавую дэманстрацыю ў Анкары. Паводле звестак Reuters, яны скандавалі лозунгі з патрабаваннем адстаўкі прэзідэнта Турцыі Рэджэпа Таіпа Эрдагана.