Зяленскі раскрыў, каму і што менавіта будзе экспартаваць Украіна
- 19.09.2025, 21:31
Ёсць прафіцыт зброі.
Украіна будзе экспартаваць у іншыя краіны некаторыя віды сваёй зброі, дзякуючы чаму пакрые дэфіцыт бюджэту. Такім чынам павялічыцца вытворчасць дронаў для фронту.
Пра гэта ў вячэрнім звароце паведаміў прэзідэнт Украіны Уладзімір Зяленскі.
- Правёў сёння Стаўку. Галоўнае - вытворчасць нашай зброі. Ёсць дакладныя аб’ёмы: што патрэбна ўкраінскай арміі да канца года, таксама на наступны год і што павінна быць у нас на складах для абароны, для падтрымання дастатковай нашай сілы, - расказаў Зяленскі.
Паводле яго слоў, ідзе пра дастатковае фінансаванне вытворчасці ўкраінскай зброі, а таксама пра вытворчасць разам з саюзнікамі і пастаўкі ва Украіну таго, што партнёры вырабляюць самі.
- Дэфіцыт у фінансаванні вытворчасці зброі ў нас будзем пакрываць з гэтага года ў тым ліку за кошт кіраванага экспарту некаторых відаў нашай зброі. Дзякуючы такому кіраванаму экспарту будзем павялічваць вытворчасць дронаў для фронту, - адзначыў прэзідэнт Украіны.
Ён падкрэсліў, што пэўныя віды сучаснай зброі Украіна можа вырабляць у значна большых аб’ёмах, чым можа сама прафінансаваць, а пэўныя віды зброі — ужо ў значна большым аб’ёме, чым рэальна трэба.
«Прыклад — марскія дроны, на якія разлічвае свет і якія ў нас у прафіцыце, а таксама супрацьтанкавая зброя, некаторыя іншыя віды», - патлумачыў Зяленскі.
Прэзідэнт Украіны падкрэсліў, што першы прыярытэт - гэта фронт, забеспячэнне брыгад. Другі прыярытэт - украінскія арсеналы. І толькі трэці прыярытэт - кіраваны экспарт.
«На працягу двух тыдняў будзе прадстаўлены канцэпт - тры новыя экспартныя платформы. Першая платформа для экспарту і ўзаемадзеяння з ЗША, другая платформа - гэта нашы еўрапейскія партнёры, трэці накірунак - іншыя партнёры ў свеце, якія таксама зацікаўленыя ў украінскай зброі і ад якіх Украіна атрымала тую ці іншую падтрымку», - расказаў ён.
Па словах кіраўніка ўкраінскай дзяржавы, абавязкова, каб гэта была ўзаемная дапамога.
«Украіна не будзе займацца “узброенай дабрачыннасцю” і дапамагаць тым, каму абыякавая Украіна. Мы гатовыя працаваць з тымі, хто нас сапраўды падтрымліваў, нашу незалежнасць», - падкрэсліў Зяленскі.
Ён адзначыў, што павінен быць і надзейны экспартны кантроль - каб да ўкраінскіх тэхналогій, да нашай зброі не дабраліся расіяне і іх саўдзельнікі.
- Шмат пра гэта казалі нашы ўкраінскія кампаніі, кампаніі-вытворцы зброі. У свеце вялікая цікавасць да сумесных праектаў з Украінай па вытворчасці зброі. Ёсць і выразны попыт на нашу зброю. Адпаведна, дзякуючы менавіта кіраванаму экспарту мы зможам акумуляваць грошы на большую вытворчасць тых рэчаў, якія патрэбныя нашай арміі, - дадаў украінскі прэзідэнт.