У НАТА заяўляюць, што перахапілі расійскія самалёты, якія ўварваліся ў Эстонію

• 19.09.2025, 18:45

Міністэрства замежных спраў Эстоніі выклікала часовага паверанага Расіі.

Прэс-сакратар Паўночнаатлантычнага альянсу Элісан Харт заявіла, што НАТА адрэагаваў на парушэнне паветранай прасторы Эстоніі расійскімі знішчальнікамі у пятніцу.

Як піша «Еўрапейская праўда», пра гэта яна паведаміла ў X.

Спікер НАТА пацвердзіла, што раніцай у пятніцу «расійскія самалёты парушылі паветраную прастору Эстоніі».

— НАТА неадкладна адрэагаваў і перахапіў расійскія самалёты. Гэта яшчэ адзін прыклад безадказных паводзінаў Расіі і здольнасці НАТА рэагаваць на такія дзеянні, — дадала яна.

У пятніцу тры расійскія знішчальнікі МіГ-31 без дазволу ўвайшлі ў паветраную прастору Эстоніі над Фінскім залівам і заставаліся там у агульнай складанасці 12 хвілін.

Пасля гэтага Міністэрства замежных спраў Эстоніі выклікала часовага паверанага Расіі і выказала яму пратэст.

Галоўная дыпламатка ЕС Кая Каллас сказала, што парушэнне паветранай прасторы Эстоніі расійскімі ваеннымі самалётамі з'яўляецца «надзвычай небяспечнай правакацыяй».