Новым камандзірам легендарнай брыгады Узброеных Сіл Украіны стаў 26-гадовы Герой Украіны

• 19.09.2025, 16:31

Што пра яго вядома.

47-й асобнай механізаванай брыгадзе (АМБр) «Магура» Узброеных Сіл Украіны прызначылі новага камандзіра, ім стаў 26-гадовы падпалкоўнік Максім Данільчук. Пра гэта 19 верасня паведаміў у Facebook Жытомірскі абласны тэрытарыяльны цэнтр камплектавання (ТЦК).

«Новым камандзірам 47-й асобнай механізаванай брыгады «Магура» УСУ стаў 26-гадовы Герой Украіны падпалкоўнік Максім Данільчук. Ён ураджэнец вёскі Барвінаўка Звягельскага раёна Жытомірскай вобласці, выпускнік Нацыянальнай акадэміі сухапутных войскаў», – гаворыцца ў паведамленні.

У ТЦК распавялі, што Данільчук за час поўнамаштабнай вайны РФ супраць Украіны прайшоў шлях ад камандзіра роты да камандзіра батальёна 30-й АМБр імя князя Канстанціна Астрожскага, ваяваў у Харкаўскай і Данецкай абласцях.

Брыгада «Магура» ўдзельнічае ў баявых дзеяннях з 2022 года. Яна стала вядомая падчас контрнаступу на Данецкім, Запарожскім напрамках, а таксама ў Курскай аперацыі.