Беларусы тыднямі чакаюць пасылак з Wildberries

• 19.09.2025, 11:08

У чым прычына.

Беларусы скардзяцца, што тыднямі чакаюць пасылак з Wildberries. Кампанія пракаментавала для telegraf.news, што адбываецца на іхнім складзе пад Мінскам. Раней прадаўцы паказалі велізарныя чэргі, а кліенты паскардзіліся на затрымкі замоў.

Прэс-сакратарка Wildberries у Беларусі Ксенія Куніцкая патлумачыла, што ў кампаніі «назіраюць істотнае павелічэнне попыту і ўзрослую дынаміку ў аб'ёмах замоў з боку пакупнікоў». Гэта звязваюць з «актыўнай працай па папулярызацыі на Wildberries беларускіх тавараў і прыцягненнем на платформу айчынных вытворцаў, уключаючы дзяржаўныя прадпрыемствы».

«У выніку паток тавараў, што накіроўваюцца на склады і сартавачыя цэнтры Wildberries у Беларусі, вырас больш чым у два разы, што стварыла павышаную нагрузку на інфраструктуру», — адзначыла яна.

Па словах прадстаўніцы WB, цяпер кампанія «рэалізуе комплекс захадаў для стабілізацыі сітуацыі». Для разгрузкі прыёмкі і змяншэння чаргі там паабяцалі «прыцягнуць дадатковыя рэсурсы на склады».