У сталічнае Уручча накіравалі цыстэрны з пітной вадой

• 19.09.2025, 9:59

Што там адбылося?

У частцы сталічнага мікрараёна Уручча можа адсутнічаць водазабеспячэнне. Гэта звязана з тым, што раніцай 19 верасня спынілася насосная станцыя, паведаміў «Мінскводаканал». У Уручча накіравалі аўтацыстэрны з вадой.

Каля 8.40 19 верасня з-за адключэння электраэнергіі адбылося спыненне тэхналагічнага абсталявання насоснай станцыі «Рагачоўская».

«У выніку адключэння ў спажыўцоў мікрараёна «Уручча» ў межах: МКАД — прасп. Незалежнасці — вул. Рагачоўская — вул. Герояў 120-й дывізіі — вул. Скарыны магчымыя перабоі з водазабеспячэннем», — паведаміў «Мінскводаканал».

Прадпрыемствам накіраваныя аўтацыстэрны з пітной вадой.

Адначасова прымаюцца ўсе неабходныя меры для найхутчэйшага аднаўлення водазабеспячэння.