Украінскія дроны атакавалі стратэгічны аб'ект каля Феадосіі

• 19.09.2025, 9:42

Мясцовыя жыхары чулі не менш за пяць выбухаў.

Уначы і раніцай 19 верасня дроны атакавалі ваенныя і стратэгічныя аб'екты на тэрыторыі часова акупаванага Крыму. Пра гэта паведамілі расійскія Telegram-каналы, піша Диалог.UA.

Паводле даных Telegram-каналаў, БПЛА, у прыватнасці, атакавалі аб'екты ў раёне акупаванай Феадосіі. А 05:38 у Феадосіі і прыгарадах прагрымелі першыя выбухі. Мясцовыя жыхары кажуць, што чулі не менш за пяць выбухаў.

Расійская акупацыйная адміністрацыя маўчыць пра атаку дронаў на ваенныя аб'екты ў Крыме. Мінабароны РФ заявіла, што ўначы 19 верасня ў небе над часова акупаваным Крымам расійская супрацьпаветраная абарона быццам бы перахапіла і знішчыла чатыры ўкраінскія БПЛА.

Трэба адзначыць, што ЗСУ раней ужо некалькі разоў атакоўвалі ваенныя і стратэгічныя аб'екты РФ каля акупаванай Феадосіі. Напрыклад, яшчэ ў кастрычніку 2024 года дроны ўдарылі па Феадосійскай нафтабазе, якая забяспечвае палівам расійскую акупацыйную армію. У выніку паветранага ўдару на яе тэрыторыі пачаўся моцны пажар. Агонь на нафтабазе не маглі патушыць некалькі дзён.

Таксама ў раёне Феадосіі ЗСУ раней атакоўвалі марскі нафтавы тэрмінал. Гэты аб'ект адносіцца да Феадосійскай нафтабазы. Відаць, цяпер украінскія дроны зноў нанеслі «візіт» гэтым стратэгічным аб'ектам.