На Пакроўскім напрамку ў расіян выявілі сур'ёзную праблему

• 19.09.2025, 8:35

У раёне Добрапілля ЗСУ акружаюць адразу пяць брыгад РФ.

У расійскіх акупантаў на Пакроўскім напрамку ў Данецкай вобласці катастрафічна не стае ваеннай тэхнікі і транспарту. Пра гэта ў сваім Telegram-канале праінфармавала ўкраінскі партызанскі рух «Атеш».

Паводле звестак «Атеш», тэхнікі вельмі не стае, у прыватнасці, у 1442-м мотастралковым палку расійскай акупацыйнай арміі, які знаходзіцца на Пакроўскім напрамку.

Там не стае не толькі ваеннай тэхнікі і аўтамабіляў, але нават матацыклаў. Дайшло да таго, што расійскія акупанты забіраюць транспарт у мясцовых жыхароў. Да таго ж самі акупанты пачалі часцей красці адзін у аднаго аўтамабілі і матацыклы.

Транспарт у мясцовых жыхароў расійскія салдаты адбіраюць па загадзе камандавання. Усё гэта вядзе да зрыву лагістыкі і павелічэння страт сярод асабовага складу.

Трэба адзначыць, што Пакроўскі напрамак ужо некалькі месяцаў запар з'яўляецца самым «гарачым» участкам фронту. Вораг спрабуе акружыць і захапіць Пакроўск.

З гэтай мэтай камандаванне акупацыйных войскаў РФ сканцэнтравала ў раёне гэтага горада групоўку колькасцю больш за 110 тысяч чалавек.

Асабліва сур'ёзная сітуацыя склалася ў раёне Добрапілля, дзе ЗСУ спрабуюць акружыць адразу пяць брыгад акупацыйнай арміі РФ.

Паводле звестак ОСГВ «Днепр», на гэтым тыдні вораг рэзка актывізаваўся на Добрапільскім напрамку каля Пакроўска.

Напрыклад, 17 верасня на Добрапільскім напрамку расійскія акупанты ўдвая павялічылі колькасць штурмаў пазіцый ЗСУ. Ідуць баі каля населеных пунктаў Русін Яр, Сафіеўка, Шахава, Новае Шахава, Уладзіміраўка, Сухецкае, Палтаўка, Навапаўлаўка і Залаты Калодзеж.