Літва канчаткова адключылася ад расійскай энергасістэмы

• 18.09.2025, 19:53

Вільнюс узмацняе энергетычную незалежнасць.

Літва завяршыла дэмантаж ліній электраперадачы, якія звязвалі яе з расійскай энергасістэмай.

Пра гэта гаворыцца ў заяве літоўскага аператара перадачы электраэнергіі Litgrid, паведамляе Delfi.

Аператар адзначыў, што былі дэмантаваныя ўсе ўчасткі трансгранічных ліній электраперадачы, якія злучалі Літву з Калінінградскай вобласцю.

Такім чынам, Літва канчаткова адключылася ад расійскай энергасістэмы, а таксама ўмацавала інтэграцыю ў кантынентальную электраэнергетычную сістэму Еўропы.

«Пасля завяршэння ўсіх дэмантажных работ мы цалкам пазбавімся ад непатрэбнай інфраструктуры, тым самым яшчэ больш умацаваўшы нашу энергетычную незалежнасць», — падкрэсліў генеральны дырэктар Litgrid Рокас Масюліс.

Дэмантаж ЛЭП працягваўся крыху больш за сем месяцаў — працы пачаліся 8–9 лютага гэтага года, пасля таго як краіны Балтыі сінхранізаваліся з кантынентальнымі электрасеткамі Еўропы.