Трамп: Пуцін падвёў мяне

• 18.09.2025, 18:34

Прэзідэнт ЗША пракаментаваў нежаданне дыктатара РФ спыніць вайну ва Украіне.

Кіраўнік Расіі Уладзімір Пуцін «сапраўды падвёў» амерыканскага лідара Дональда Трампа у пытанні мірнага ўрэгулявання вайны ва Украіне. Сваім абурэннем з нагоды непадатлівасці калегі з Крамля гаспадар Белага дома падзяліўся 18 верасня падчас прэс-канферэнцыі з прэм’ер-міністрам Вялікабрытаніі Кірам Стармерам.

Трамп у чарговы раз заявіў, што ён скончыў сем войнаў, і расійска-украінская павінна стаць восьмай. Прэзідэнт ЗША падкрэсліў, што канфлікт ва Украіне ён лічыў найлягчэйшым для завяршэння дзякуючы, як ён думаў, яго адносінам з Уладзімірам Пуціным.

— Я думаў, што прасцей за ўсё будзе правесці аперацыю дзякуючы маім адносінам з прэзідэнтам Пуціным, але ён падвёў мяне. Ён сапраўды падвёў мяне. Гэта павінны былі быць Расія і Украіна. Пабачым, чым гэта скончыцца, — падкрэсліў амерыканскі лідар.

Стармер дадаў, што падчас сустрэчы кіраўнікі дзвюх краін абмеркавалі варыянты павелічэння падтрымкі Украіны.

Раней Дональд Трамп неаднаразова выказваў сваё расчараванне дзеяннямі Уладзіміра Пуціна адносна Украіны.

2 верасня ён заявіў, што з прэзідэнтам Расіі ў яго «заўсёды былі выдатныя адносіны».

— Я вельмі расчараваны. Тысячы людзей паміраюць. Паміраюць не амерыканцы, а рускія, украінцы, і іх — тысячы, і гэта бессэнсоўная вайна. <…> Пабачым, што будзе, але я вельмі расчараваны ў прэзідэнце Пуціне. Магу гэта сказаць, і мы зробім нешта, каб дапамагчы людзям жыць. Ведаеце, справа не ва Украіне. Справа ў тым, як жывуць людзі. Штотыдзень памірае 7000 чалавек. Пераважна салдаты. Але 7000 чалавек. І калі я магу дапамагчы спыніць гэта, я лічу сваім абавязкам гэта зрабіць. Я вельмі расчараваны, — адзначыў Трамп.

Раней міністр замежных спраў Расіі Сяргей Лаўроў патлумачыў рэгулярнае «расчараванне» прэзідэнта ЗША Дональда Трампа тэмпамі ўкраінскага ўрэгулявання яго звычкай вырашаць праблемы хутка.

— Калі прэзідэнт Трамп кажа, што ён расчараваны, часткова, як мне здаецца, — я, натуральна, не магу сказаць, што вельмі добра яго ведаю, але тым не менш размаўляў з ім некалькі разоў, і пэўнае ў мяне ўяўленне склалася, — часткова гэта тлумачыцца тым, што яму хочацца хуткіх рашэнняў, — сказаў Лаўроў у інтэрв’ю на Першым канале. — Дзесьці гэта можа атрымацца, дзесьці — наўрад ці.