ЕС ацэньвае магчымыя эканамічныя наступствы закрыцця польска-беларускай мяжы
- 18.09.2025, 18:31
Закрыццё мяжы можа паралізаваць гандаль паміж Еўрасаюзам і Кітаем.
Закрыццё польска-беларускай мяжы можа паралізаваць гандаль паміж Еўрасаюзам і Кітаем, паведамляе Euronews.
Еўрапейская камісія спрабуе ацаніць магчымыя эканамічныя наступствы закрыцця ўсіх пунктаў пропуску паміж Польшчай і Беларуссю. Праз польска-беларускую мяжу ажыццяўлялася перавозка 90% чыгуначных грузаў паміж ЕС і КНР, вартасць якіх складае 25 мільярдаў еўра ў год.
«Мы, вядома, уважліва вывучаем сітуацыю, але пакуль рана ўдавацца ў дэталі», — заявіў 18 верасня намеснік галоўнага прэс-сакратара Еўракамісіі Улаф Гіл.
У польскім МУС прызналі, што перавозчыкі адчуваюць «цяжкасці з лагістыкай», і прапанавалі выкарыстоўваць як альтэрнатыўны маршрут пункт пропуску паміж Беларуссю і Літвой.
«Страты будуць ацэнены, калі мы даведаемся, як доўга будзе зачыненая мяжа», — раней паведамлялі ў ведамстве.
Пры гэтым Еўрапейская камісія дзейнічае асцярожна, каб не склалася ўражанне, што яна крытыкуе Польшчу.
«Гэта пытанне бяспекі», — сказаў Улаф Гіл, паўтараючы пазіцыю Польшчы. «Закрыццё мяжы, праз якую праходзяць гандлёвыя шляхі, адбіваецца на гандлі. Мы падтрымліваем кантакты з польскімі ўладамі, каб вывучыць усе аспекты гэтага пытання. Любыя праблемы ў гандлі, якія ўзнікаюць у выніку такой сітуацыі з бяспекай, адбываюцца з-за жорсткай, незаконнай і неапраўданай вайны Расіі», — сказаў Гіл.
Нагадаем, 15 верасня з візітам у Варшаву прыязджаў міністр замежных спраў Кітая Ван І. Адной з тэм перамоваў стала блакіроўка транзіту, ключавога для кітайскіх тавараў.
18 верасня міністр замежных спраў Польшчы Радаслаў Сікорскі паведаміў, што Польшча чакае ад Кітая дапамогі ў спыненні беларускіх правакацый на мяжы — тады праца пунктаў пропуску будзе адноўлена.
Польшча цалкам зачыніла мяжу з Беларуссю, уключаючы чыгуначныя зносіны, апоўначы 12 верасня. Прэм'ер-міністр краіны Дональд Туск патлумачыў гэтае рашэнне ростам колькасці правакацый з боку Расіі і Беларусі і сумеснымі ваеннымі вучэннямі «Захад-2025».
9 верасня міністр унутраных спраў Марцін Кервінскі заявіў, што памежныя пераходы з Беларуссю будуць адкрытыя толькі тады, калі Польшча будзе на 100% упэўненая, што сітуацыя больш не нясе ніякай пагрозы для краіны і яе грамадзян.