У Францыі сотні тысяч выйшлі на пратэсты супраць жорсткай эканоміі

• 18.09.2025, 18:22

Настаўнікі, медыкі і чыгуначнікі далучыліся да масавых страйкаў.

У Францыі ў чацвер, 18 верасня, сотні тысяч чалавек па ўсёй краіне ўзялі ўдзел у акцыях супраць палітыкі жорсткай эканоміі. Паводле дадзеных прафсаюзаў, ужо раніцай у пратэстах удзельнічалі да 400 тысяч чалавек, а пазней да іх далучыліся дэманстранты ў Парыжы і іншых гарадах.

У акцыях узялі ўдзел настаўнікі, машыністы цягнікоў, фармацэўты і супрацоўнікі бальніц. Школьнікі заблакавалі дзясяткі ліцэяў, пратэстуючы супраць павышэння пенсійнага ўзросту і скарачэння выдаткаў на сацыяльныя патрэбы.

На мітынгах гучалі лозунгі з патрабаваннем адмяніць планы папярэдняга ўрада па скарачэнні бюджэту і павялічыць фінансаванне дзяржаўных паслуг.

«Гнеў велізарны, і рашучасць таксама. Маё пасланне спадару Лекорню (прэм'ер-міністр Францыі Себасцьян Лекорню. — Рэд.) сёння такое: менавіта вуліцы павінны вырашаць бюджэт», — заявіла кіраўніца прафсаюза CGT Сафі Біне.

Кіраўніца прафсаюза CFDT Мерыліз Леон назвала пратэсты «ясным папярэджаннем» прэм'ер-міністру. «Мы хочам сацыяльна справядлівага бюджэту», — падкрэсліла яна.

Прэзідэнт Францыі Эмануэль Макрон і новы прэм'ер Лекорню апынуліся паміж пратэстоўцамі і інвестарамі, занепакоенымі дэфіцытам другой эканомікі еўразоны. Парламент пры гэтым застаецца глыбока расколатым.

Міністэрства ўнутраных спраў раней паведаміла, што ў акцыях могуць узяць удзел да 800 тысяч чалавек. У Парыжы на працу не выйшлі амаль палова настаўнікаў пачатковых школ, па ўсёй краіне — кожны трэці.

Рух рэгіянальных цягнікоў быў моцна парушаны, у той час як высокахуткасныя лініі TGV у асноўным працавалі. На паўднёва-ўсходзе краіны пратэстоўцы перакрывалі трасы, запавольваючы рух транспарту.

У Нанце падчас мітынгаў адбыліся сутыкненні, паліцыя прымяніла слезацечны газ. У Ліёне, паводле паведамленняў СМІ, былі паранены трое чалавек.