Вялікабрытанія і ЗША падпісалі «пагадненне аб тэхналагічным росквіце»

• 18.09.2025, 17:30

Трамп і Стармер дамовіліся аб супрацоўніцтве ў сферы квантавых тэхналогій, ядзернай энергетыкі і штучнага інтэлекту.

Вялікабрытанія і Злучаныя Штаты падпісалі так званае «пагадненне аб тэхналагічным росквіце», што адбылося падчас дзяржаўнага візіту Дональда Трампа у Злучанае Каралеўства, паведамляе BBC.

Прэзідэнт ЗША Дональд Трамп і прэм’ер-міністр Вялікабрытаніі Кір Стармер падпісалі «пагадненне аб тэхналагічным росквіце», якое прадугледжвае паглыбленае супрацоўніцтва краін у такіх сферах, як квантавыя камп’ютары, ядзерная энергетыка і штучны інтэлект.

Стармер заявіў, што гэта найбуйнейшае падобнае пагадненне ў гісторыі Вялікабрытаніі і яно забяспечыць «мільярдныя патокі ў абодва бакі праз Атлантычны акіян» і інвестыцыі ў Вялікабрытанію, якія акажуць адчувальны ўплыў на жыццё людзей.

Паралельна шэраг амерыканскіх тэхналагічных гігантаў абвясцілі пра інвестыцыі ў Вялікабрытанію.

Microsoft абвясціў пакет інвестыцый аб’ёмам 30 млрд долараў, які стане самым буйным па-за межамі ЗША; Google абяцае каля 6 млрд долараў на даследчую працу ў сферы штучнага інтэлекту і інфраструктуры; Nvidia — 500 мільёнаў на развіццё сеткі дата-цэнтраў.